i.

Dul i gcomhar le heagraíochtaí áitiúla um litearthacht sna meáin, chomh maith le comhlachais, grúpaí agus líonraí ábhartha, tacaíocht airgeadais a thabhairt do thionscnaimh agus d’fheachtais a bhaineann le toghcháin, iad a chomhroinnt agus a chomhtháthú ar an ardán, lena n-áirítear trí thionscnaimh chomhpháirteacha a fhorbairt. Is acmhainn luachmhar iad eagraíochtaí áitiúla um litearthacht sna meáin i dtéarmaí an eolais ar chomhthéacsanna áitiúla agus ar spriocphobail. Molann an Coimisiún úsáid a bhaint as líonra EDMO agus a mhoil agus as Sainghrúpa an Choimisiúin um Litearthacht sna Meáin chun teacht ar na heagraíochtaí ábhartha ar leibhéal na mBallstát.

ii.

Bearta ionaclaithe a fhorbairt agus a chur i bhfeidhm lena gcothaítear athléimneacht roimh ré in aghaidh insintí bréagaisnéise agus teicnící ionramhála a d’fhéadfadh a bheith ann agus a bhfuil coinne leo trí úsáideoirí a chur ar an eolas agus a ullmhú. Le bearta den sórt sin, ba cheart an comhthéacs sonrach áitiúil ina ndéantar iad a chur san áireamh agus ba cheart iad a chomhlánú le bearta eile lena dtugtar faisnéis iontaofa d’úsáideoirí. Is féidir cineálacha difriúla beart ionaclaithe a bheith ann, lena n-áirítear e.g., idirghabhálacha cluichithe, amhail rannpháirtíocht i gcluichí ar líne maidir le giniúint bréagaisnéise lena spreagtar machnamh criticiúil ar na teaicticí a úsáidtear chun tionchar a imirt (25), físeáin nó cineálacha eile inneachair (26), agus i gcás inarb indéanta, ba cheart iad a chur chun feidhme san aip chun éascaíocht rochtana a chothú.

iii.

Agus feachtais litearthachta sna meáin á ndearadh, moltar do sholáthraithe VLOPanna nó VLOSEnna insintí sonracha a chur san áireamh chomh maith le teaicticí, teicnící agus nósanna imeachta a chuireann le rioscaí sistéamacha ar dócha go dtarlóidh siad roimh thoghchán, lena linn agus ina dhiaidh, i gcomhréir leis an gcur chuige maidir le bearta maolaithe a oiriúnú don chomhthéacs náisiúnta ábhartha agus do spriocphobail.

i.

Lipéid seiceála fíricí ar bhréagaisnéis agus ar inneachar FIMI a sainaithníodh arna soláthar ag seiceálaithe fíricí neamhspleácha agus ag foirne seiceála fíricí de chuid eagraíochtaí meán neamhspleácha. Ba cheart cumhdach seiceála fíricí a leathnú ar fud an Aontais agus a theangacha, inter alia tríd an gcomhar le seiceálaithe fíricí áitiúla a neartú le linn tréimhsí toghcháin, trí inneachar seiceála fíricí a bhaineann le toghcháin a chomhtháthú agus a thaispeáint, agus trí shásraí a úsáid chun tionchar na nithe sin ar na spriocphobail a mhéadú. Ba cheart na lipéid seiceála fíricí a bheith inrochtana agus scríofa i dteanga shothuigthe.

ii.

Leideanna agus poiteanna lena moltar d’úsáideoirí inneachar a léamh agus meastóireacht a dhéanamh ar a chruinneas agus ar a fhoinse sula roinnfidh siad é.

iii.

Tásca soiléire, infheicthe agus neamh-mheabhlacha maidir le cuntais oifigiúla, chomh maith le cuntais ina dtugtar faisnéis údarásach maidir leis an bpróiseas toghchánach, amhail cuntais na n-údarás toghcháin, lena n-áirítear an bonn ar a mbunaítear fíorú den sórt sin. Na critéir as a dtugtar lipéad ‘oifigiúil’ do chuntas, ba cheart iad a chur ar fáil go héasca agus a sholáthar i dteanga shothuigthe, ionas nach dtabharfaidh tásca den sórt sin creidiúnacht do chuntais a dhéanann pearsanú ar chuntais oifigiúla, amhail cuntais na n-údarás toghcháin.

iv.

Lipéadú soiléir, infheicthe agus neamh-mheabhlach ar chuntais atá á rialú ag na Ballstáit, ag tríú tíortha agus ag eintitis atá á rialú nó á maoiniú ag eintitis atá á rialú ag tríú tíortha.

v.

Uirlisí agus faisnéis chun cuidiú le húsáideoirí measúnú a dhéanamh ar iontaofacht foinsí faisnéise, amhail trustmharcanna atá dírithe ar shláine na foinse bunaithe ar mhodheolaíochtaí trédhearcacha arna bhforbairt ag tríú páirtithe neamhspleácha.

vi.

Uirlisí eile chun bunáitíocht, stair eagarthóireachta, barántúlacht, nó cruinneas inneachair dhigitigh a mheasúnú. Cuidíonn siad sin le húsáideoirí barántúlacht a sheiceáil nó bunáitíocht nó foinse an inneachair a bhaineann le toghcháin a shainaithint.

vii.

Bearta inmheánacha éifeachtacha a bhunú chun cur i gcoinne na mí-úsáide a bhaintear as aon cheann de na nósanna imeachta agus na huirlisí thuas, go háirithe an mhí-úsáid a bhaintear as an bpróiseas fíoraithe maidir le cuntais agus inneachar lipéadaithe.

i.

A áirithiú go ndéanfar córais moltaí a dhearadh agus a choigeartú ar bhealach a thugann roghanna fiúntacha agus rialuithe d’úsáideoirí ar a bhfothaí, agus aird chuí á tabhairt ar éagsúlacht agus iolrachas na meán;

ii.

Bearta a bhunú chun suntasacht na bréagaisnéise a laghdú i gcomhthéacs toghchán bunaithe ar mhodhanna soiléire trédhearcacha, e.g. maidir le hinneachar meabhlach a deimhníodh a bheith bréagach nó go bhfuil sé ag teacht ó chuntais a bhfuarthas amach arís agus arís eile go bhfuil bréagaisnéis á scaipeadh acu;

iii.

Bearta a bhunú chun teorainn a chur le méadú inneachair mheabhlaigh, bhréagaigh nó mhíthreoraigh a ghintear leis an intleacht shaorga i gcomhthéacs toghchán trína gcórais moltaí;

iv.

Measúnú rialta a dhéanamh ar fheidhmíocht agus ar thionchar na gcóras moltaí agus aghaidh a thabhairt ar aon riosca nó saincheist atá ag teacht chun cinn a bhaineann le próisis thoghchánacha, lena n-áirítear trí bheartais, cleachtais agus algartaim a thabhairt cothrom le dáta agus a mhionchoigeartú;

v.

Bearta a bhunú chun trédhearcacht a thabhairt maidir le dearadh agus feidhmiú córas moltaí, go háirithe i ndáil leis na sonraí agus leis an bhfaisnéis a úsáidtear chun córais a dhearadh lena gcothaítear iolrachas sna meáin agus éagsúlacht inneachair, chun grinnscrúdú tríú páirtí agus taighde a éascú;

vi.

Dul i dteagmháil le páirtithe seachtracha chun tástáil sáraíochta agus cleachtaí foirne deirge a dhéanamh ar na córais sin chun rioscaí a d’fhéadfadh a bheith ann a shainaithint amhail rioscaí a eascraíonn as claontacht, soghabháltacht i leith ionramhála, nó mífhaisnéis, bréagaisnéis, FIMI nó inneachar díobhálach eile a mhéadú.

i.

Faisnéis a thabhairt d’úsáideoirí maidir leis na fógráin pholaitiúla a fheiceann siad, amhail céannacht an urraitheora agus, i gcás inarb infheidhme, céannacht an eintitis a rialaíonn an t-urraitheoir sa deireadh; an tréimhse ar lena linn atá sé beartaithe an fógrán polaitiúil a fhoilsiú, a sheachadadh nó a scaipeadh; méideanna comhiomlánaithe agus luach comhiomlánaithe na sochar eile a fhaigheann soláthraithe seirbhísí fógraíochta polaitiúla; chomh maith le faisnéis fhiúntach faoi na príomhpharaiméadair a úsáidtear chun an faighteoir a gcuirtear an fógra ina láthair a chinneadh.

ii.

Stór fógraí polaitiúla atá ar fáil go poiblí agus atá inchuardaithe a choinneáil ar bun, a thabharfar cothrom le dáta a ghaire agus is féidir don fhíor-am. Áireofar leis sin, ar a laghad, líon iomlán fhaighteoirí na seirbhíse a sroicheadh agus, i gcás inarb infheidhme, na huimhreacha comhiomlána arna miondealú de réir an Bhallstáit don ghrúpa nó do na grúpaí faighteoirí ar díríodh an fógrán go sonrach orthu, mar a sainordaíodh le hAirteagal 39 de Rialachán (AE) 2022/2065, agus d’fhéadfadh sé go n-áireofaí leis freisin e.g., méideanna comhiomlánaithe agus luach comhiomlánaithe na sochar eile a fhaigheann na soláthraithe, an líon imprisean agus na limistéir gheografacha inar cuireadh an fógra i láthair.

iii.

Nuair nach gceadaíonn siad fógraíocht pholaitiúil ar a gcuid seirbhísí, ba cheart córais éifeachtúla fíorúcháin a chur i bhfeidhm agus na bearta is gá a dhéanamh chun a áirithiú go ndéanfar an cinneadh a fhorfheidhmiú go hiomchuí.

iv.

A áirithiú go bhfuil beartais agus córais leordhóthanacha i bhfeidhm chun cosc a chur ar mhí-úsáid córas fógraíochta chun faisnéis mhíthreorach, bréagaisnéis agus FIMI a scaipeadh maidir le próisis thoghchánacha, lena n-áirítear inneachar meabhlach a bhaineann leis an intleacht shaorga ghiniúnach.

i.

Feidhmiúlacht a sholáthar chun gur féidir le tionchairí a dhearbhú an fógraíocht pholaitiúil é an t-inneachar a sholáthraíonn siad nó an bhfuil fógraíocht pholaitiúil san inneachar sin, lena n-áirítear céannacht an urraitheora agus, i gcás inarb infheidhme, an t-eintiteas a rialaíonn an t-urraitheoir ar deireadh; an tréimhse ar lena linn atá sé beartaithe an fógrán polaitiúil a fhoilsiú, a sheachadadh nó a scaipeadh; méideanna comhiomlánaithe agus luach comhiomlánaithe na sochar eile a fhaigheann soláthraithe seirbhísí fógraíochta polaitiúla; chomh maith le faisnéis fhiúntach faoi na príomhpharaiméadair a úsáidtear chun an faighteoir a gcuirtear an fógra ina láthair a chinneadh.

ii.

A áirithiú gur féidir le faighteoirí eile na seirbhíse a shainaithint ar bhealach soiléir suntasach gan débhrí agus i bhfíor-am, lena n-áirítear trí lipéadú feiceálach, gur fógraíocht pholaitiúil é an t-inneachar a sholáthraítear nó an bhfuil fógraíocht pholaitiúil san inneachar sin, mar a thuairiscítear i ndearbhú an tionchaire.

i.

Molann an Coimisiún do sholáthraithe VLOPanna agus VLOSEnna a rialacha a fhorbairt agus a fhorfheidhmiú, lena gcuirtear cosc ar mheabhlaireacht trí iarrthóirí a phearsanú, meáin mheabhlacha ionramháilte a chur chun feidhme, úsáid rannpháirtíochtaí bréige, teachtaireachtaí neamh-thrédhearcacha íoctha, nó cur chun cinn neamh-thrédhearcach ag tionchairí, chomh maith le comhordú a dhéanamh ar chruthú inneachair bhréagaigh nó ar iompraíocht.

ii.

Molann an Coimisiún comhar idir na foirne ábhartha de chuid sholáthraithe éagsúla VLOPanna agus VLOSEnna chun bagairtí coiteanna a shainaithint agus chun feachtais bhréagaisnéise trasardáin, gníomhaíocht FIMI nó gníomhaíocht fuatha, antoisceach (foréigneach) nó radacaithe a chomhrac, ar nithe iad sin a d’fhéadfadh tionchar a imirt ar dhaoine aonair maidir lena roghanna toghchánacha agus imirce gníomhaithe mailíseacha (féach roinn 3.4 maidir le comhar le húdaráis náisiúnta, le saineolaithe neamhspleácha agus le heagraíochtaí na sochaí sibhialta).

i.

Molann an Coimisiún do sholáthraithe VLOPanna agus VLOSEnna faisnéis shoiléir phoiblí a chur ar fáil maidir leis na próisis inmheánacha agus na bearta maolaithe, amhail lipéadú, marcáil, ísliú céime nó baint, atá i bhfeidhm chun na beartais sin a fhorfheidhmiú;

ii.

Molann an Coimisiún do sholáthraithe VLOPanna agus VLOSEnna dul i gcomhar le seiceálaithe fíricí agus faisnéis a chomhroinnt leo faoi inneachar meabhlach den sórt sin chun a áirithiú go n-íoslaghdaítear riosca an mhéadaithe in ardáin eile.

i.

Molann an Coimisiún do sholáthraithe VLOPanna agus VLOSEnna comhéadain agus uirlisí atá caighdeánach agus éasca le húsáid a sholáthar d’úsáideoirí chun lipéid a chur ar inneachar a ghintear leis an intleacht shaorga;

ii.

Agus inneachar intleachta saorga giniúnaí á lipéadú, molann an Coimisiún do sholáthraithe VLOPanna agus VLOSEnna lipéid éifeachtúla a chur i bhfeidhm, ar lipéid iad atá inaitheanta go héasca ag úsáideoirí, agus gnéithe amhail grafaicí, suíomh agus uainiú á gcur san áireamh, agus leas á bhaint as taighde eolaíoch maidir le héifeachtacht na lipéad (31). Ba cheart do sholáthraithe VLOPanna agus VLOSEnna éifeachtacht na lipéad sin a thástáil freisin sula n-eiseofar iad agus ba cheart dóibh iad a oiriúnú agus a fheabhsú bunaithe ar aiseolas agus ar thaithí;

iii.

Molann an Coimisiún do sholáthraithe VLOPanna agus VLOSEnna a chinntiú go gcoinneofar an lipéad ar an inneachar intleachta saorga giniúnaí lipéadaithe nuair a chomhroinnfidh úsáideoirí eile ar an ardán é.

i.

Sa chomhthéacs sin, ba cheart do sholáthraithe VLOPanna agus VLOSEnna dul i gcomhar le soláthraithe córas intleachta saorga giniúnaí agus bearta ceannródaíocha úrscothacha a leanúint chun a áirithiú go ndéanfar comharthaí uisce, sainaithint meiteashonraí, modhanna cripteagrafacha chun bunáitíocht agus barántúlacht an inneachair a chruthú, modhanna logála, méarloirg nó teicnící eile a bhrath ar bhealach iontaofa agus éifeachtach; moltar dóibh freisin tacú le nuálaíochtaí teicneolaíochta nua chun éifeachtacht agus idir-inoibritheacht na n-uirlisí sin a fheabhsú.