(1)

Le Treoir 2007/25/CE ón gCoimisiún (2), áiríodh démheatomorf mar shubstaint ghníomhach in Iarscríbhinn I a ghabhann le Treoir 91/414/CEE ón gComhairle (3).

(2)

Maidir leis na substaintí gníomhacha a áirítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

Formheas na substainte gníomhaí démheatomorf, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 15 Feabhra 2025.

(4)

Cuireadh iarratas faoi bhráid na hÍsiltíre, an Ballstát is rapóirtéir, agus faoi bhráid na Gearmáine, an Ballstáit is comhrapóirtéir, chun formheas na substainte gníomhaí démheatomorf a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) agus laistigh den tréimhse ama dá bhforáiltear san Airteagal sin.

(5)

Chuir na hiarratasóirí na sainchomhaid fhorlíontacha is gá faoi bhráid an Bhallstáit is rapóirtéir, an Bhallstáit is comhrapóirtéir, an Choimisiúin agus an Údaráis Eorpaigh um Shábháilteacht Bia (‘an tÚdarás’) i gcomhréir le hAirteagal 6 de Rialachán Cur Chun Feidhme (AE) Uimh. 844/2012. Chinn an Ballstát is rapóirtéir an t-iarratas a bheith comhlánaithe ina iomláine.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis agus an Choimisiúin í an 1 Lúnasa 2017. Ina dhréacht-tuarascáil maidir le measúnú ar athnuachan, mhol an Ballstát is rapóirtéir go ndéanfaí an formheas ar dhémheatomorf a athnuachan.

(7)

Chuir an tÚdarás an sainchomhad achomair forlíontach ar fáil don phobal. Scaip an tÚdarás an dréacht-tuarascáil maidir le measúnú ar athnuachan ar na hiarratasóirí agus ar na Ballstáit freisin chun barúlacha a fháil uathu agus sheol sé comhairliúchán poiblí ina leith. Chuir an tÚdarás na barúlacha a fuarthas ar aghaidh chuig an gCoimisiún.

(8)

An 26 Bealtaine 2023, chuir an tÚdarás an chonclúid (6) uaidh in iúl don Choimisiún maidir le cé acu is féidir nó nach féidir coinne a bheith leis go gcomhlíonfaidh démheatomorf na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(9)

Sa chonclúid uaidh, shainaithin an tÚdarás roinnt réimsí imní. Go háirithe, aicmíodh démheatomorf mar shubstaint thocsaineach don atáirgeadh, catagóir 1B. An 20 Meán Fómhair 2019 ghlac an Coiste um Measúnú Riosca de chuid na Gníomhaireachta Eorpaí Ceimiceán tuairim (7) i gcomhréir le hAirteagal 37(4) de Rialachán (CE) Uimh. 1272/2008 ó Pharlaimint na hEorpa agus ón gComhairle (8) inar tháinig sé ar an gconclúid gur aicmíodh démheatomorf mar shubstaint thocsaineach don atáirgeadh, catagóir 1B (H360F ‘d’fhéadfadh sé damáiste a dhéanamh do thorthúlacht’). Dá réir sin, le Rialachán Tarmligthe (AE) 2021/849 ón gCoimisiún (9) leasaíodh Iarscríbhinn VI a ghabhann le Rialachán (CE) Uimh. 1272/2008 agus aicmíodh démheatomorf mar shubstaint thocsaineach don atáirgeadh de chatagóir 1B.

(10)

Tháinig an tÚdarás ar an gconclúid freisin go meastar go gcomhlíonann démheatomorf na critéir maidir le suaiteoirí inchríneacha le haghaidh daoine agus mamaigh fhiáine mar orgánaigh nach spriocorgánaigh iad a leagtar amach i bpointí 3.6.5 agus 3.8.2 d’Iarscríbhinn II a ghabhann le Rialachán (CE) Uimh. 1107/2009, mar gheall ar a módúlachtaí éastraigine, andraigine agus stéaróidiginis.

(11)

Ní féidir nochtadh diomaibhseach a léiriú i gcás démheatomoirf ós rud é go bhféadfaí coinne a bheith leis go mbeadh iarmhair ann le haghaidh na n-úsáidí ionadaíocha uile agus i mbarra uainíochta, iarmhair atá os cionn an luacha réamhshocraithe 0,01 mg/kg. Dá bhrí sin, na ceanglais a leagtar amach i bpointí 3.6.4 agus 3.6.5 d’Iarscríbhinn II a ghabhann le Rialachán (CE) Uimh. 1107/2009, ní chomhlíontar iad.

(12)

Tháinig an tÚdarás ar an gconclúid nach bhfuil gá le démheatomorf chun baol tromchúiseach do shláinte plandaí a rialú, baol nach féidir a shrianadh trí mhodhanna eile atá ar fáil lena n-áirítear modhanna neamhcheimiceacha, i gcomhréir le hAirteagal 4(7) de Rialachán (CE) Uimh. 1107/2009. I gcás úsáidí ionadaíocha athnuachan na substainte gníomhaí (galar Phytophthora i sú talún, coincleach chlúmhach i leitís agus i bhfiniúin), tá substaintí gníomhacha malartacha ar fáil i bhformhór na gcásanna agus d’fhéadfadh údar eolaíoch a bheith ann le maolú i líon an-bheag cásanna, e.g. i gcásanna nuair nach bhfuil modhanna malartacha neamhcheimiceacha ar fáil nó nuair nach bhfuil siad indéanta. Thairis sin, d’fhéadfadh teaglaim de mhodhanna ceimiceacha agus neamhcheimiceacha a bheith ann chun na lotnaidí a rialú i roinnt barr. Ina theannta sin, níor sainaithníodh aon bhaol tromchúiseach do shláinte plandaí a mbeadh gá le húsáid démheatomoirf ina leith. Dá bhrí sin, measann an Coimisiún nach gcomhlíontar na coinníollacha maidir leis an maolú in Airteagal 4(7) de Rialachán (CE) Uimh. 1107/2009 a chur i bhfeidhm.

(13)

Chuir an Coimisiún dréacht-tuarascáil athnuachana maidir le démheatomorf faoi bhráid an Bhuanchoiste um Plandaí, Ainmhithe, Bia agus Beatha an 12 Deireadh Fómhair 2023.

(14)

D’iarr an Coimisiún ar na hiarratasóirí a mbarúlacha a chur isteach i leith chonclúid an Údaráis. Thairis sin, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012, d’iarr an Coimisiún ar na hiarratasóirí a mbarúlacha a chur isteach i leith na tuarascála athnuachana. Chuir na hiarratasóirí a mbarúlacha isteach, agus rinneadh scrúdú cúramach orthu.

(15)

D’ainneoin na n-argóintí a rinne na hiarratasóirí, ní fhéadfaí an t-ábhar imní a bhaineann leis an tsubstaint ghníomhach a chur as an áireamh.

(16)

Dá réir sin, maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad, níor suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009. Dá bhrí sin, is iomchuí gan formheas na substainte gníomhaí démheatomorf a athnuachan i gcomhréir le hAirteagal 20(1), pointe (b), den Rialachán sin.

(17)

Dá bhrí sin, ba cheart Rialachán Cur Chun Feidhme (AE) Uimh. 540/2011 a leasú dá réir.

(18)

Ba cheart am leordhóthanach a thabhairt do na Ballstáit údaruithe maidir le táirgí cosanta plandaí ina bhfuil démheatomorf a tharraingt siar.

(19)

Maidir le táirgí cosanta plandaí ina bhfuil démheatomorf, i gcás ina ndeonóidh na Ballstáit aon tréimhse chairde i gcomhréir le hAirteagal 46 de Rialachán (CE) Uimh. 1107/2009, níor cheart an tréimhse sin a bheith níos faide ná 12 mhí ó dháta theacht i bhfeidhm an Rialacháin seo.

(20)

Le Rialachán Cur Chun Feidhme (AE) 2023/918 ón gCoimisiún (10) cuireadh síneadh leis an tréimhse formheasa le haghaidh démheatomoirf go dtí an 15 Feabhra 2025 chun go bhféadfar an próiseas athnuachana a chur i gcrích sula rachaidh tréimhse formheasa na substainte gníomhaí sin in éag. Mar sin féin, ós rud é go ndéantar cinneadh gan an formheas a athnuachan roimh dhul in éag na tréimhse formheasa sin ar cuireadh síneadh léi, ba cheart feidhm a bheith ag an Rialachán seo tráth is luaithe ná an dáta sin.

(21)

Leis an Rialachán seo, ní chuirtear cosc ar iarratas eile a chur isteach maidir leis an tsubstaint ghníomhach démheatomorf a fhormheas de bhun Airteagal 7 de Rialachán (CE) Uimh. 1107/2009.

(22)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,